尋日講開日軍响二戰侵華期間使用糜爛劑、噴嚏劑等等毒劑，傷害中國軍民。日軍除咗將呢啲毒劑裝入炮彈之外，喺山西展開「三光作戰」嘅時候，仲會用糜爛劑嚟污染米、肉、罐頭、家具、武器、軍裝等，當啲中國軍民掂到呢啲糜爛劑，身體隨即潰爛。「三光作戰」其實係指日軍喺1940年施行嘅「燒光、殺光、搶光」政策，日本稱之為「燼滅作戰」，意思係「燒盡滅絕」，同「燒光、殺光、搶光」相近。

根據資料，日軍响1940年10月至11月期間，喺華北地區展開掃蕩，居然下令殺死中方陣地裡面嘅所有人、燒毀所有房屋，將啲煮食器具打碎或者落毒，而帶唔走嘅糧食亦都要燒清光，目的就係企圖「燼滅」中方陣地、令中國士兵無法生存。喺三光作戰開始初期，有位經過河北同山西兩省嘅傳教士報道日軍惡行，提到日軍會將三份一或四份一嘅村落燒毀，並且殺死幾千名村民，如果係一啲較大規模嘅掃蕩，仲會見到有一架架卡車將啲值錢嘢帶走。呢位傳教士仲話，河北同山西差唔多有一半嘅家畜都被日軍殺死，有好多村莊因為啲雞被日軍殺晒而無雞蛋賣。喺山西嘅沁源縣，係其中一個抗日基地，全縣有8萬人，有4900人被殺，數百家人被滅絕，九成半嘅房屋被燒毀。

日兵菊池義郎提過，當年實施「三光政策」時，日軍每去一條村莊，都會破壞家具同燒屋，佢哋仲講過，如果有500個日軍去到有100人住嘅村落住一晚，咁條村就算經過十年都恢復唔到原貌。

圖為日軍實行「三光政策」，取自網絡。